എസ് പി

കുറച്ചു നാള്‍ മുമ്പ് നടത്തിയ ട്രെയിന്‍ യാത്രയ്ക്കിടയില്‍ എന്റെ അടുത്തിരുന്ന രണ്ടു യുവാക്കളുടെ സംഭാഷണം ഞാന്‍ ശ്രദ്ധിക്കുവാന്‍ ഇടയായി.

പല വിഷയങ്ങളും ചര്‍ച്ച ചെയ്തു ചര്‍ച്ച ചെയ്തു അവര്‍ ഒടുവില്‍ കട്ടുറുമ്പില്‍ എത്തി. ഞാന്‍ അക്കാലത്ത് പടച്ചു വിട്ട പല കട്ടുറുമ്പുകള്‍ , അതിലെ തമാശകള്‍ പറഞ്ഞു അവര്‍ ചിരിച്ചു തുള്ളുന്നു. പദ്മ ഭൂഷന്‍ കിട്ടിയ വ്യക്തിയ്ക്ക് ഉണ്ടാകുന്ന ആത്മ സന്തോഷം പോലെ എന്തോ ഒന്ന് എന്റെ മനസ്സിലും കടന്നു പോയി. അതായത് ഒരു പണിയും ചെയ്യാതെ എന്തോ ഒരു ഉലക്ക കിട്ടുമ്പോള്‍ കിട്ടുന്ന ഒരു സുഖം.

ഇത് എഴുതുന്നവന്‍ പുലിയാണ് , അവനെ സമ്മതിച്ചു കൊടുക്കണം എന്നൊക്കെ പറഞ്ഞപ്പോള്‍ ഈ ബോഗിയില്‍ ഒരു എ സി ഉണ്ടായിരുന്നെങ്കില്‍ എന്ന് ഞാന്‍ ആശിച്ചു പോയി . പിന്നെ എന്റെ ചിന്ത നിങ്ങള്‍ പറയുന്ന പുലി ഞാനാടാ മക്കളെ എന്ന് എപ്പോള്‍ ഇവരോട് പറയും എന്നായി.

കുറച്ചു കൂടി കഴിയട്ടെ എന്നെ പൊക്കി പൊക്കി അങ്ങ് മണ്ടയ്ക്ക് ഇരുത്തുമ്പോള്‍ നാടകീയമായി ഞാന്‍ എന്നെ വെളിപ്പെടുത്താം എന്ന് കരുതിയിരുന്നു. ഓന്തിന്റെ നിറം മാറുന്നതിലും വേഗത്തില്‍ ആയിരുന്നു പിന്നെ അവന്മാരുടെ സംഭാഷണം. എന്നെ പറ്റി പറയുന്നത് കേട്ട് തൊലിയുരിഞ്ഞു പോയി.

പോയി രണ്ടെണ്ണം പൊട്ടിച്ചാലോ എന്ന് കരുതിയെങ്കിലും ആരോഗ്യ ശാസ്ത്രത്തില്‍ അവര്‍ക്ക് എന്നെക്കാള്‍ ഒരു ഡിഗ്രി കൂടുതല്‍ ഉള്ളത് കൊണ്ട് ഞാന്‍ പതിയെ എണീറ്റ്‌ ബോഗി മാറി ഇരുന്നു.

കാണുന്നതിലും കേള്‍ക്കുന്നതിലും ഞാന്‍ കണ്ടെത്തുന്ന നര്‍മ്മങ്ങള്‍ കുറിച്ചിടുന്ന ആക്ഷേപ ഹാസ്യ പംക്തിയാണ് കട്ടുറുമ്പ്. ഇവ ചിലപ്പോള്‍ നിങ്ങളെ ചിന്തിപ്പിക്കുന്നതും ചിരിപ്പിക്കുന്നതും ആയിരിക്കും. മറ്റു ചിലപ്പോള്‍ അവ വെറും തറയും ആയിരിക്കാം. അടുത്ത കാലത്ത് പ്രസിദ്ധീകരിച്ച ചിലവ പലരെയും മാനസീകമായി വേദനിപ്പിച്ചു എന്ന് ഞാന്‍ മനസ്സിലാക്കുന്നു.

ഇത് എഴുതുന്നവന്‍ ആരെണെന്ന് അറിഞ്ഞാല്‍ ഒരു പക്ഷെ നിങ്ങള്‍ക്ക് ഇത്തരം വിഷമങ്ങള്‍ തോന്നുവാന്‍ ഇടയില്ല. അതുകൊണ്ട് ഞാന്‍ എന്നെ ഒന്ന് വെളിപ്പെടുത്തട്ടെ.

പേര് : സാജു പാപ്പച്ചന്‍ (ചൂണ്ടി കാണിക്കുവാന്‍ ഒരു അപ്പന്‍ ഉണ്ടെന്നു മനസ്സിലായല്ലോ).

ബ്ലഡ്‌ ഗ്രൂപ്പ്‌ : O -ve (സ്വഭാവത്തെപ്പറ്റിയും ഏകദേശ രൂപം കിട്ടി കാണുമല്ലോ).

തൊഴില്‍ : Busy with no work = വായ്നോട്ടം.

ഒരു മനുഷ്യനെയും സ്നേഹിക്കുന്നില്ല.

ഒരു മനുഷ്യനും എന്നെയും സ്നേഹിക്കുന്നില്ല എന്നതും സത്യം.

ഒരു മനുഷ്യനും ഞാനാല്‍ രക്ഷ പെട്ടിട്ടില്ല.

ഒരുത്തനും എനിക്കും ഒന്നും ഒലത്തിയിട്ടില്ല.

നന്മ എന്ന് വാക്ക് വെറുതെ പോലും ഞാന്‍ ഉപയോഗിച്ചിട്ടില്ല.

അംഗീകാരം ഇഷ്ടപ്പെടുന്നില്ല. മറ്റാരെയെങ്കിലും അംഗീകരിക്കുക, ഹും … ഇനിയും ഒരു ഏഴ് ജന്മം കൂടി ജനിക്കണം.

പണവും സൌന്ദ്യര്യവും ഞാന്‍ ഒട്ടും ഇഷ്ടപ്പെടുന്നില്ല. കാരണം രണ്ടും എനിക്കില്ല.

ഒരു ആള്‍ ദൈവവും എന്റെ മനസ്സില്‍ ഇല്ല, എന്തിന് ഏഴു അയല്‍വക്കത്ത്‌ പോലുമില്ല.

ഞാന്‍ ഒരു വിശ്വസാഹത്യകാരന്‍ അല്ല , മറിച്ച് ഒരു നിലവാരം കുറഞ്ഞ എഴുത്തുകാരന്‍ ആണ്.

അങ്ങാടിയിലും കവലയിലും ഇരുന്നു കേശവനും നാണപ്പനും പറയുന്ന കാര്യങ്ങള്‍ ആണ് ഞാന്‍ എഴുതി വിടുന്നത്.

കേശവനും നാണപ്പനും സൈബര്‍ ലോകത്ത് ഇടതു കാല്‍ വെച്ച് കയറുന്ന കാലത്ത് ഞാന്‍ ഈ പണി നിറുത്തും.

ഇങ്ങനെയുള്ള ഒരു കൊഞ്ഞാണന്‍ ഉതിര്‍ക്കുന്ന വെടികളെ നിങ്ങള്‍ എന്തിന് ഭയക്കുന്നു. വെറുതെ ചിരിച്ചു തള്ളുക.

എങ്കിലും എന്റെ വായനക്കാര്‍ ലോല മനസ്സുള്ളവര്‍ ആണെന്ന് ഞാന്‍ മനസ്സിലാക്കുന്നു. അതുകൊണ്ട് ഏതെങ്കിലും കട്ടുറുമ്പ് നിങ്ങളുടെ ഹൃദയ വികാരങ്ങളെ മുറിപ്പെടുത്തുന്നുണ്ടെങ്കില്‍ ദയവായി ഞങ്ങളെ editor@janakesari.com എന്ന വിലാസത്തില്‍ അറിയിക്കുക. 24 മണിക്കൂറിനകം അത് എടുത്തു മാറ്റുന്നത് ആയിരിക്കും.

ചില സാങ്കേതിക കാരണങ്ങളാല്‍, ക്ഷമിക്കണം രാഷ്ട്രീയ കാരണങ്ങളാല്‍ ഇതിനെ ചവുറ്റു കൊട്ടയില്‍ തള്ളി.